Smaointe le haghaidh Lá na Sábháilteachta Idirlín nach sáraíonn srianta Covid-19

I mbliana, níos mó ná riamh cheana, bain an leas is mó is féidir as na hacmhainní atá ar fáil duit chun aird a tharraingt ar Lá na Sábháilteachta Idirlín. Cén fáth nach bhfiosrófá na scáileáin i do scoil a úsáid chun feasacht a ardú faoi shábháilteacht ar líne? Is deis iontach a bheadh ann chun aird phobal uile na scoile a tharraingt, trí fhíseáin a thaispeáint agus leideanna a thabhairt.

D’fhéadfá do chuid féin a chruthú, nó d’fhéadfá úsáid a bhaint as cuid dár bhfíseáin faoinsábháilteacht ar líne, nó d’fhéadfá meascán den dá rud a úsáid!

Is deis mhaith é Lá na Sábháilteachta Idirlín chun teagmháil a dhéanamh le tuismitheoirí agus iad a chur ar an eolas faoi na gníomhaíochtaí atá ar siúl ar scoil, agus iad a spreagadh a bheith níos rannpháirtí sa tsábháilteacht idirlín.

Is féidir leat ár dteimpléad saor in aisce do litir a úsáid, agus í a chur in oiriúint do do scoil féin.

Is bealach cruthaitheach é, agus bealach a bhfuil an-tóir air, físeán nó podchraoladh a dhéanamh chun Lá na Sábháilteachta Idirlín a chomóradh agus chun sábháilteacht idirlín a chur chun cinn. Bíodh agallaimh, comhairle nó leideanna faoin tsábháilteacht ar líne á dtaifeadadh ag na scoláirí, is deis a bheadh ann dóibh foghlaim faoin tsábháilteacht ar líne, agus chun a bhfíseán nó a bpíosa fuaime féin a phleanáil agus a thaifeadadh agus eagarthóireacht a dhéanamh air.

Má tá inspioráid á lorg agat, léigh faoin tslí ar úsáid scoláirí físeáin agus podchraoltaí chun aird a tharraingt ar Lá na Sábháilteachta Idirlín sna blianta roimhe seo.

Cén fáth nach mbainfeá úsáid as nuachtán nó suíomh gréasáin do scoile chun poiblíocht a dhéanamh ar Lá na Sábháilteachta Idirlín?

Ní hamháin gur deis a bheadh ann do scileanna scríbhneoireachta a thaispeáint, is féidir feasacht faoi imeachtaí nó gníomhaíochtaí atá ag tarlú a ardú trí inneachar a chruthú do na hardáin sin, nó chun leideanna a thabhairt faoi ábhair éagsúla a bhaineann le sábháilteacht ar líne, amhail cumarsáid mheasúil, folláine ar líne, íomhánna a roinnt agus príobháideachas.

D’fhéadfá Preaseisiúint a scríobh freisin agus í a sheoladh chuig do nuachtán nó stáisiún raidió áitiúil chun aird a tharraingt ar na gníomhaíochtaí atá ar bun sa scoil chun Lá na Sábháilteachta Idirlín a chomóradh.

Is féidir ár dteimpléad de Phreaseisiúint a íoslódáil agus a chur in oiriúint do do scoil féin!

Déan suirbhé ar scoláirí sa scoil chun a dtuairimí a fháil faoi ábhar nó ábhair sábháilteachta idirlín.

Is bealach maith é sin freisin chun aird a tharraingt ar shábháilteacht ar líne agus is féidir é a úsáid mar bhuntaca chun na cineálacha saincheisteanna a ndíreofar orthu ar Lá na Sábháilteachta Idirlín, nó ar feadh na bliana, a chinneadh.

Cé gur dheacair do scoileanna cuireadh a thabhairt d’aíonna teacht chun na scoile chun labhairt faoin tsábháilteacht idirlín aghaidh ar aghaidh de bharr shrianta Covid19, cén fáth nach smaoineofá ar sheimineár gréasáin nó caint fhíorúil a reáchtáil don rang?

Is deis iontach é Lá na Sábháilteachta Idirlín chun sábháilteacht ar líne a chur chun cinn agus chun raon príomhábhar a fhiosrú – agus is bealach fíormhaith é féachaint ar fhíseáin faoin tsábháilteacht ar líne chun tús a chur leis an bplé!

Tá físeáin do bhunscoileanna agus d’iarbhunscoileanna ag Webwise, ina bhfiosraítear raon saincheisteanna tábhachtacha amhail cumarsáid mheasúil/cibearbhulaíocht, fógraíocht ar líne, faisnéis bhréagach, olltiomsú sonraí, íomhánna a roinnt agus féinmheas.

Tá na físeáin go léir saor in aisce agus is féidir iad a shruthú nó a íoslódáil ónár suíomh gréasáin. Tá na físeáin le fáil anseo.

Cruthaigh Blag, suíomh gréasáin nó feachtas ar na meáin shóisialta faoi #SID2021. Cibé acu an feachtas a mhairfidh mí atá ar bun agat, nó gníomhaíochtaí níos lú chun aird a tharraingt ar an tsábháilteacht ar líne, is bealach iontach atá sna meáin shóisialta chun lucht féachana níos mó a aimsiú do do theachtaireacht. Déan machnamh ar na hardáin is féidir leat a úsáid, ar an lucht féachana atá tú ag iarraidh a aimsiú, agus ar na teachtaireachtaí ar mian leat aird a thabhairt orthu!

Cuimhnigh go bhféadfaidh tú páirt a ghlacadh sa phlé náisiúnta agus idirnáisiúnta ach an haischlib #SID2021 a úsáid, agus trí Webwise Ireland a chlibeáil ar na meáin shóisialta.

Tá cuir i láthair saor in aisce a bhfuil script leo le fáil, ar leibhéal bunscoile agus iarbhunscoile. Ceapadh iad go sonrach chun cabhrú le scoileanna agus le heagraíochtaí a bheidh rannpháirteach i Lá na Sábháilteachta Idirlín. Is féidir na cuir i láthair a úsáid sa seomra ranga agus tá gníomhaíochtaí agus ábhair físeáin a thacaíonn leo.

Is bealach spraíúil é tráth na gceist chun Lá na Sábháilteachta Idirlín a cheiliúradh. Faigh amach cé chomh gaoiseach faoin ngréasán atá do scoláirí leis an tráth na gceist idirghníomhach Laochra HTML, nó bain úsáid as Ceacht 8 san acmhainn chun measúnú a dhéanamh ar chumas do scoláirí cumarsáid agus caidreamh a dhéanamh le daoine eile ar líne gan iad féin a chur i mbaol gan ghá, leis an tráth na gceist Chatwise.

Nó cruthaigh do thráth na gceist féin le haghaidh Lá na Sábháilteachta Idirlín, ach uirlisí ar líne a úsáid, amhail Kahoot, Menti Meter, nó Quizizz.

Bain úsáid as ár ngníomhaíocht faoin gCód Ar Líne in-íoslódáilte chun cabhrú le scoláirí treoirlínte ar úsáid an idirlín agus na teicneolaíochta a fhorbairt agus a chur i bhfeidhm, agus chun cabhrú le cosc a chur ar chibearbhulaíocht. Is cuid de Cheacht 5 den acmhainn oideachais MySelfie agus an Domhan Mór í an ghníomhaíocht sin.

Is cuma cé chomh mór nó chomh beag d’imeacht nó do ghníomhaíocht, má tá Lá na Sábháilteachta Idirlín á chomóradh agat – inis dúinn faoi!

Léireoidh léarscáil idirghníomhach na hÉireann um Lá na Sábháilteachta Idirlín na scoileanna ar fud na tíre a bheidh rannpháirteach sa lá.

Cláraigh le bheith ar an léarscáil agus le pacáiste SAOR IN AISCE faoi Lá na Sábháilteachta Idirlín a fháil do do scoil!